puisi madura aries kelana

( KAULE ORENG MADURA)

Paseser malathe ngapote

E polo madhura

Se ampon kalonta kaloar

Poncana polo jhabe

Kaule nika oreng madhura

Ta’ todus bhan ta’ malo

Akantha accen rassa bujhana

Se theddhi ter ater  

E sabbhan - sabbhan naghare se atatanggha

Madhura mon nyamana

Olama’ keae jhanur konenga

Sabhina sullam ngajhi santrena

Sekken tor bhagus tatakramana

Madhura mon dhisana

Bhegus ongghu lanceng parabhana

Meltas manjhalin mon palembeye

Bennya’ oreng dhu se ataretana

Aeng mata saghara

Se teddhi nyolpu’ kerrenga

Pangorebhan

Reng oreng se odi’ e madhura

Ojhan tor panas

Omba’ rajha’

Asapo’ angin kacellebhan

Ta’ teddhi panyellathan

Elen jhelen pangara

Ka angguy oreng madhure

Kauleh nika oreng madhure

Ajharing jhuko’ ka polo jhaba

Parao alajher dhari saghare

Atane bhako padi anye sadhaje

Tan taretan kaule sathaje

Ngereng papade ajhagha

Mella’ metthem ka angguy naghare

Tale bhukel penjhung tananga

Moghe ta’ lontor

Kerras ta’ akerres

Bhathe’ pamorra

Aeng mata dere se ghegger

Dhari attas bun embuna’a

Soca sape kerrapan

Ta’ teddhi pangolatan

Sampe’ aghili ka raba – raba

Athaddiyaki selat madhure

Dhari delemma ate

Poncana polo madhura

Tor ator se kengbingkeng

Dha’ taretan se badha emadhura

Ngereng Song – osong lombung, jung rojung pa’ opa’ iling

Moke’e madhura tepteppa

jheje rajjha

kantos sa omorra

Lenteng, 25 Nopember 2010

( PANA PANESER )

Ondhem akheluy ngajak dha’ angen se dhateng

Mesem dha’ ka ate se patteng

Akhantha ledeng celleng pattheng

Agulung abareng bi’ ombe’ se dhateng

Ka angguy madepa’ pana paneser

Dha’ aba’ se kerker akhantha ola’ tanoker

Ngambhang bulan mekkar malathe

Abareng bi’ ate se mate

Ta’ andi’ arte

Jha’ odi’na ka angguy mate

Pana paneser

Maenga’ dha’ odi’ se keccer

Pana paneser

Gagger ka karang ate se arongkang

Sabhangsana ona’ bhan carang

Ja’ aba’na e’ amba’ ola’ bhan caceng

Dhu,…… pana paneser

Soko ngatter tanang kacep

Edhalem odi’ se keccer

Dhu,…….pana paneser

Mella’ matthem

Edhalem odi’ ate se celleng

Ka angguy sango abe’

Edhalem kobur se petteng

 Lenteng, 3 November 201

(BATO KO’ONG )

Ebhaktona nyengkap careta odi’

Se e salsal angen sale’bung

Bhan lendu se maondhak

Ghartunga ate se e pajhi

Ngeba aba’ kettur ta’ andi’ ora’

Keringking ka konco’ konco’na

Tonju’ manis

Abhareng bi’ nyabe

Se tapalke’ akelle’

Sambi aghaje’

Ghejena aba’ ataretan ban omba’

Jhau dhari parebasen na’a

Oreng toa se duwe’

Bile enga’ pessena ebu

Senga’ cong jha’ sampe’ tapolong

Kembhang se sakongkong

Se e tamen tombu e pamengkanga temon

Se bhadi ejhaleni kalabhan

Soko tonggal netteng  

Nyatana aba’ se takeda’

E dhalem odi’ se coma sakejja’

Asapo’ abuko’ ta’ enga’ jha’ aba’na

La ta’ samporna pole

Ondhem se celleng

ojan ban angin  se dhateng

ejhilet kelat lat ngoncelat

aphareng bi’ aba’na se malarat

patarangan becca seppe dhari caca ban bhanta

kalaban ojan pello ecampor copa

se e tartar sampe’ ngalancar

aghili ka bhantal saghara anyar

aba’ se taleccer

e dhalem odi’ se talengser

se ta’ endha’ arasok pekker

ebhaktona nyengkap kaodi’an se ko’ong

abhareng bi’ kembhang se tapolong

e konco’ bhungkela

kembhanga se tapancong

Songenep, 14 Desember 2010

 ( BULAN TANGGAL SAKALEYAN )

Karang ate se arongkang

Padenah carang e tase’ caltong

Ser ngalesser angen

E babana dhaun camara

Gaggar dhaun koneng

Arendu e talpe’ bume bhan paesan

E gulung a perruy akhantha

Omba’ se agundel

Jal gunjalan paraoh e’ ambad

Omba’ bhan angen

Se ampon kandas kalabbuen pesa

Amoara lanjhang

Ateh se alajar arasok daun kelor

Tapengsor dha’ mesemma

Bulan tanggal sakaleyan

Ebbun se ceddu

Ma arbes dha’ soca

E dalem odi’ se arengsa

Se coma’ e rasok

Aranca’ sokma

Songenep, 3 Nopember 2010

( POSAPO LENTE )

Mara tuli area’ gembuli 

Posapo lente se badhi

Maberse da’ ate

Ja’ pera’ ngebe robu

Dari tase’ dari alam

Ekaot sapo’ sampe’ nyarbu

Akantha abu ekibe lendu

Mara tuli area’ gembuli

Posapo lente mabarse

Rombu e dalem ate

E gabay sango pate se paste

Lenteng, 20 Desember 2010

( BALAI TAONAN )

Ebaktona angen nyoroy ka’ pungkaan

Sampe’ merret maleddet

Ondhem se celleng e saksene kelat se ngalacat

Aperruy abareng bi’ omba’ se agulung

Du…guste ..!

Dusa se akantha kapo’ e kaot sapo’

Nampes amarga cuko’

Seta’ andi’ bangko ban katedungan

Se noro’ aros ros terrosan

Balai taonan ampon dateng

Banne keng alamma seta’ enda’ ataretan

Tape manossana seta’ enda’ arabat

Sampe ababat alalabat

Ngarajai napsona

Lenteng, 21 Desember   2010